本文重點
賭王何鴻燊入院治療一段時間，今日喺醫院度過八十八歲生日，但燊哥一啲都唔寂寞，幾位太太及仔女尋日輪流去醫院拜壽，仲帶備名牌禮物；二太藍瓊纓及子女更豪捐一百五十萬元畀慈善機構，貫徹燊哥為善最樂嘅宗旨。
太太兒女輪流送禮
捐贈儀式上，大會預備咗壽包同賭王賀壽，二太即場食番；被賭王讚為「密底算盤」嘅兒子，臨走前不忘攞番八個壽包返去孝敬賭王，佢話爸爸身體唔錯，可以食到壽包喎。
何家千金話，賭王一向「取諸社會、用諸社會」，睇見子女慷慨解囊，就係最好嘅生日禮物。
雖然掏腰包做咗善事，但燊哥份禮物絕無縮水。二太女兒超鳳尋朝拎住個名牌Hermes紙袋去醫院探病，三太女兒超雲就同拎住個連卡佛大紙袋嘅助手抵埗，四太女兒超盈親製大畫框，貼上自己同爸爸嘅溫馨照片，以英文寫上祝福字句，夠晒心思！
三太拎住個公文袋，唔知內裏有乜乾坤；四太就連續兩次用手喺自己胸口做出心形動作。太太同仔女都咁有心，燊哥肯定冧晒啦！
