林D9日前喺電台透露，舉行五區補選涉及一點五億元開支，暗批泛民嘅建議浪費公帑，但其實暗地裏佢已經諗定晒舉行補選嘅法律、人手、資源同策略安排，當中最重要嘅就係投票日期。

預算案後補選

政府最擔心係泛民拖到明年二月中、即政改諮詢期結束後先至辭職，咁根據補選喺正式辭職約四個月後舉行嘅慣例，五區補選就要喺「六四」同「七一」呢兩個敏感日子前後舉行，對政府同建制派都相當不利。依家泛民計劃喺下月中辭職，就合晒政府心意，只要政府喺二月底發表嘅預算案加碼派糖，再喺三月中舉行補選就啱晒；即使預算案反應欠佳，政府以籌備需時為由押後到四月份先投票，泛民亦冇藉口提出挑戰。

建制派估計泛民喺九龍東同新界西有機會落選，政府內部都係咁睇，但亦做好最壞打算，一旦泛民真係喺五區都贏晒，政府亦可以自圓其說搵下台階。政府認為，泛民一直強調自己有六成選民支持，如果佢哋最後喺補選中只能攞番接近或少於六成得票，咁只算「打回原形」，代表唔到市民真係支持泛民嘅所有訴求；即係話，泛民要攞到高於六成甚至接近七成得票，公投先講得上係成功。

睇番泛民喺去年立法會選舉嘅得票，九東只係僅僅超過五成六，即使被視為泛民「票倉」嘅港島區，亦差少少先夠六成。政府將個勝選門檻定得咁高，泛民就算着埋彈弓鞋都無乜可能跨得過喇！

反而另一個建制派虎視眈眈嘅新西選區，泛民上屆得票原來都有六成一，但如果泛民最後派出社民連嘅陳偉業出選，政府估計佢不但唔可以攞足其他泛民黨派嘅票源，甚至連佢僅有嘅少數鄉事票，到時都會喺「新界王」劉皇發發功下流失埋。不過「人算不如天算」，如果泛民最後改變策略，押後辭職日期同換人參選，林D9就有排頭痕，可見呢場攻防戰仲存在好多變數。