古代行軍打仗有云：「三軍未動，糧草先行。」由官場重投商界嘅中策集團主席馬時亨，上周四（十九日）去銅鑼灣出席中策記者會前夕，先到幾條街之隔、位於禮頓道嘅「飯堂」醫肚，同枱仲有一班朋友，原來肥亨代表有事缺席嘅集團行政總裁柯清輝招呼商界朋友。
肥亨離開官場後呢兩年積極瘦身，飲食慣咗少鹽少油，有時鍾意幫襯中環德己笠街間「鮨雄」日本菜，但請客點都揀番御用「飯堂」，喜歡餸菜清淡得嚟夠多元化，好似招牌點心上素蒸粉果、檸檬叉燒酥、小籠包等，仲有生炒西洋菜鬆、魚湯米線、和味粉絲煲等精美小菜，當然唔少得招牌靚湯啦！當日中策記招喺下午四時舉行，肥亨見有時間剩就獨自步行到富豪酒店，當係飯後散步，肥亨認真滋陰！
