香港旅遊業四面受敵，新加坡環球影城同上海迪士尼殺到埋身，全球最細嘅香港迪士尼都要諗計救亡。迪園行政總裁金民豪（Andrew）昨日出席經濟動力嘅中大講座，佢話同海洋公園老總苗樂文傾過，大家有意搵個合適時機合作，但具體未決定。大家都知道兩個樂園向來係死敵，海洋公園寧願搵三碌拎合作推出門票折扣優惠，都唔受迪士尼玩，關係有幾好可想而知！
正所謂「求人不如求己」，Andrew明知迪園擴建等得嚟蚊都瞓，惟有叫員工一齊諗計自救，例如諗啲小遊戲同遊客玩吓咁，結果兩周內收集到四百幾條橋，推出咗個星級服務計劃，總好過乜都唔做。佢話，遊客去到迪園，如果有員工為佢哋唱吓歌、玩吓遊戲、甚至傾幾句偈、拎吓行李都好，總之令佢哋覺得自己與別不同，有賓至如歸嘅感覺，咁至可以吸引回頭客。
有中大學生問Andrew：點解迪士尼高層大部分都係老外，莫非本地學生「Quali」唔夠？Andrew就答得好得體，話迪士尼係國際公司，管理層有不同國籍唔出奇，佢自己同香港迪士尼好多管理層都係香港人，仲話香港學生一定得，叫同學定啲嚟喎。