功夫茶之所以咁抗拒呢三個字，簡直覺得悶到嘔，原因有三個：太煩，太亂，太冇癮。你知啦，平機會一次又一次鬼打鬼爆出醜聞，煩過梵蒂岡。其次呢，平機會一次又一次被揭發管理不善，亂過亂葬崗。最冇癮嘅係，明明主席鄧爾邦係一條尸位素餐嘅蛀米大蟲，先有審計署炮轟佢浪費公帑，再有立法會對於佢極度遺憾，哈，呢個爾邦哥哥居然可以臉皮厚到唔知醜，掃把掃極唔肯走，打不死嘅曱甴都要寫個服字。你話嘞，係咪冇癮到吹乒乓？

所以囉，唔該唔好再提平機……咦咦咦，咪住先，功夫茶忽然諗起一件事，一件沉悶之中見趣味嘅事。呢件趣事係咁嘅，前平機會總監，告平機會歧視。

具體詳情唔講嘞，因為雙方正在打官司，費事畀人話妨礙司法，功夫茶淨係想同大家研究一個邏輯問題。呢單官司將來必定會有一個係勝方，一個係敗方。假設前平機會總監係勝方，即係平機會知法犯法啦。假設平機會係勝方，即係前平機會總監無理取鬧啦。無論如何，呢一單咁有趣嘅官司反映咗一樣嘢，平機會係一個徹頭徹尾嘅怪胎，一係有人歧視，一係有人誣告。

功夫茶又記起另一件事。平機會唔知挑起邊條筋，居然摷番三年前《太陽報》一篇只不過批評醫管局嘅文章，話有一名患精神病嘅男子覺得呢篇文章中傷咗佢喎。

功夫茶諗極都唔明，批評醫管局同涉嫌違反《殘疾歧視條例》到底有乜嘢關係？

講到呢度，又難怪議員質詢喎，因為平機會接受無厘頭投訴嘅比例非常之高。根據數據顯示，平機會處理涉及《殘疾歧視條例》嘅投訴之中，完成調查嘅有一千二百六十三宗，高達六成半終止調查，當中四百五十七宗屬於無理取鬧。大家計一計數，完成調查即係曾經受理啦，曾經受理嘅個案居然有超過三分之一係無理取鬧，反映平機會判斷能力好有問題。功夫茶相信，如果有人走去投訴「鳳凰山歧視雞公山」，平機會照樣受理，調查一大餐之後甚至乎有可能真係提出檢控。

大律師陸偉雄認為，平機會必須對有關投訴過濾篩選，有充分理據先至可以受理，否則投訴機制有可能濫用。咁就講得啱嘞，萬一機制受到濫用，被投訴嗰個唔激死都煩死。

計功夫茶話齋，不如咁啦，反正平機會係怪胎，避免添煩添亂，避免篤眼篤鼻，索性摺咗佢啦。特區政府作為一個唔識避孕嘅多仔婆，浪費公帑一手湊大嘅公營機構多到無倫，少一個平機會咪當慳米飯囉。一句到尾，多仔婆，請墮胎！