扮嘢文天生一副模特兒骨架，講到着西裝更係「老手」，出席場合永遠有一套又酷又帥嘅西裝搶晒一眾「港男」鏡，加上一個雙手插褲袋「甫士」，電暈唔少「港女」。卓妮早前喺一個頒獎活動捉扮嘢文，解構佢嘅穿衣心得，佢怕醜地翻起西裝內裏，一睇「招牌」，原來係中環嘉軒廣場Oscar Tailor。

扮嘢文翻開西裝內裡，一睇原來係「Oscar Tailor」嘅招牌。（嚴少阡攝）	扮嘢文早前著住Oscar Tailor出品嘅西裝出席頒獎禮	對鞋就在泰國布吉訂造，圓頭設計好特別。

扮嘢文話，本來鍾情名牌Giorgio Armani，貪佢剪裁修身，不過現成西裝唔係季季啱心水，索性搞搞創意搵裁縫度身訂造，仲自創「盛智文牌」，朋友見佢設計出嚟嘅西裝咁型，以為係出自大師手筆添。

位於中環嘉軒廣場嘅「Oscar Tailor」，有好多名人光顧。

「Oscar Tailor」老闆周鉅源話，扮嘢文鍾情絲質及羊毛料西裝，一年起碼幫襯佢造五、六套。

泰國訂造「功夫鞋」

咁到底扮嘢文家中有幾多套西裝呢？佢話少計也有百幾套，顏色以黑、白及卡其色居多，款式以「簡單就是美」為原則，不愛條子西裝，也不要太老氣嘅孖襟西裝，腰前鈕扣則揀一粒鈕，睇落簡潔利落。講到西褲，扮嘢文就揀黑色直筒褲，放棄「港男」最愛嘅窄褲設計，佢話感覺優雅啲喎。

至於揀皮鞋，扮嘢文又來一招DIY，搵泰國布吉鞋匠幫佢訂造幾對圓頭平底嘅改良版「功夫鞋」，貪佢舒服唔刮腳，泰國造鞋又抵到爛，正過晒一眾字母名牌鞋多多聲喎。不過呢款「功夫鞋」唔係人人襯得起，自問唔夠潮就咪搞嘞！

卓妮同扮嘢文傾完偈後仍未夠喉，跑咗去佢御用嘅「Oscar Tailor」八卦吓。老闆周鉅源（Steven）本來想低調啲，但一聽見係「扮嘢文」嘅大名，就請卓妮坐低慢慢傾。佢話扮嘢文幫襯咗七、八年，每年例必造五、六套西裝，上周佢出席新世界主席彤叔長孫鄭志剛婚禮套西裝，都係出自周老闆手筆，質料屬全絲質，造價大約一萬蚊。不過周老闆強調呢個係超筍友情價，因為扮嘢文不時做生招牌，仲介紹埋賭業大亨史提芬‧永利（Steve Wynn）等大豪客幫襯，認真唔話得喎！

卓妮