泛民就係咪總辭搞到內訌，點知唔使諗總辭嘅自由黨內部，都有唔同意見。自由黨創黨黨員呂志華尋日刊登全版廣告，指自由黨嘅「敵人」係有中央支持嘅專業人士，佢哋令自由黨上年立法會選舉錯失兩個直選議席，矛頭直指龐愛蘭同梁美芬。呂志華嘅口氣酸溜溜，講到人哋喺自由黨碗內搶飯食。不過，自由黨常委田二少田北辰就話，呂志華既唔係常委又唔係中委，佢嘅意見絕對唔代表黨嘅意見，實行同呂志華劃清界線。
其實尋日田二少一聽到我哋問呂志華篇文章，已經耍手擰頭咁話無聽過，事前完全唔知情，但就尊重黨員嘅言論自由。不過，田二少話呂志華分析有錯，佢指影響立法會選情嘅因素有好多，唔會有一個單一原因令一個人選唔到，即使有勢力人士指明要某個人可以喺某個區選出，二少都質疑「係咪咁就贏到？」
另外，呂志華指自由黨同中央嘅關係一直都係「和而不親」，田二少反應更大，斬釘截鐵咁否認。二少話佢哋同中央係「親」，但未親到「翹埋雙手唔使做」都得到中央支持嘅地步。
田二少以「我同佢唔係朋友」為人所熟悉，今次佢同呂志華係黨友嘅關係走唔甩，兩人都係愛黨情切，但係對唔少問題嘅睇法都好唔同。