本文重點
中國人愛吃魚翅，成為全球最大嘅魚翅消費國，鯊魚瀕臨絕種引起環保團體關注，好似美國野生救援協會近年就先後邀請六名中國體育明星做形象大使，包括尋日剛委任嘅奧運跳水金牌得主郭晶晶，呼籲大家要保護鯊魚。由於晶晶突然患咗重感冒未能出席發布會，佢透過電話表示，其實保護野生動物唔使做乜嘢大事，唔食魚翅就得嘞！
「跳水公主」郭晶晶係繼籃球巨人姚明、前體操王子李寧、跳馬冠軍樓雲、乒乓球名將孔令輝及張怡寧之後嘅拒吃魚翅形象大使。晶晶話，將會盡最大力量，讓更多朋友關注保護鯊魚，拒絕食用魚翅，共同保護生態環境，究竟晶晶最終說服到幾多人拒食魚翅呢？相信佢男友霍啟剛唔會唔支持女友啩？
忽然患重感冒
晶晶上星期日出席一項商業活動時自稱身體狀態良好，但呢幾日忽然患上重感冒，實在令人擔心會否影響佢下月來港參加東亞運動會跳水三米板比賽，事關好多fans都期待佢嘅精湛表演，希望晶晶快啲好番恢復最佳狀態啦！