程介明尋日以香港大學校長資深顧問身份，出席津小議會嘅周年大會，仲舉辦「名人講座」，佢講笑話自己作為顧問嘅身份，其實即係幫手籌款，希望達到所有港大學生都可以去外國交流嘅目的。佢話識得一個哈佛學生，畢業作業就係坐一艘四十七呎長嘅船周遊列國，同行嘅只有一個水手同三個學生，四個同學仔去咗十幾個發展中及發達國家，體驗各地文化。

其實程介明自己都去唔少國家，睇睇各地的教育模式，佢話最開眼界就係去咗一間印度南部嘅學校，學校要求學生畢業前，出去街邊搵兩個街童，勸佢哋返學校讀書，如果勸唔掂，學生就唔使旨意畢業！

程就講笑話，香港都可以學吓，要老師去勸掂一個成績肥佬的學生，變番成績合格的學生喎。