本文重點
陳克勤喺上年立法會選舉勝出之後，將「Try our best」讀成「Try our breast」（試吓我哋個胸），一「乳」成名，大家以為佢會吸取教訓，多啲留意發音，點知尋日又出事，今次唔係錯英文，連母語廣東話都衰埋。佢喺立法會質問「唐唐」唐英年，指政改諮詢褫奪咗委任區議員嘅投票權時，誤將「褫奪」讀成「遞奪」，被立法會主席即場糾正，場面尷尬。
克勤仔再次被踢爆讀錯音，唐唐都有角色，事關克勤仔批評政改新建議褫奪委任區議員嘅投票權，如果唐唐若無其事回答問題就無事，但係唐唐同主席講，聽唔清楚條問題，主席於是轉述問題，順便當面糾正克勤仔，話「褫」字應該讀成「雌」音，即時哄堂大笑。不過，查實主席自己都發錯音，根據字典，「褫」字應該讀「始」音先至啱。
鐵頭仁用錯詞
立法會主席糾正完克勤仔之後，順便踢爆埋議員何俊仁，話鐵頭仁頭先用錯「勒令」一詞，應該係「敕令」，即係上級向下級傳達指令。議事堂內咬文嚼字，匯賢智庫葉劉淑儀玩埋一份，唐唐話知道議員工作沉重，葉太寸佢，話形容病情至用沉重，工作應該用「繁重」，不過唐唐唔領情，回應時話，佢都知議員工作繁忙，心煩意亂，希望葉太唔好太煩啦。