咦咦咦，咪住先，校園驗毒計劃都未實施，成個計劃仍然甩皮甩骨，邊個背脊敲得響，能夠未卜先知幾乎所有中學沉淪毒禍？原來神機妙算龜殼仙人係曾蔭權，佢致函全港中學生以及家長，話大埔校園驗毒試行計劃係要幫助青少年對抗毒品引誘，令已沾上毒品嘅學生不必單打獨鬥。煲呔曾更在新加坡語不驚人死不休，講到青少年吸毒係一個大問題，差不多每間中學都有發生，至於係咪擴大驗毒計劃，現時言之尚早。

嗯……點講好呢？功夫茶又唔想話曾蔭權「無中生有」，更加唔想話佢「惡意中傷」，費事畀佢覺得傳媒「肆意攻擊」。之不過咁，佢講到全港學生哥好似人人都係毒犯咁，好似除咗人人戒毒嘅正生書院之外，所有中學都係毒品飯堂，呢種硬銷校園驗毒計劃嘅手法，好有問題啫。

不如咁嘞，由香港賴以自豪嘅法治精神講起。

一國兩制其中一項特色係內地法律系統實行大陸法，香港用普通法。大陸法對於嫌疑人物係「假定有罪」，即係話，如果公安捉咗你，唔好意思，麻煩你自己證明你清白，否則你就係有罪。至於普通法咯喎，基本精神係「假定無罪」，如果警察捉咗你，只要控方冇辦法證明你有罪，你就係無罪。

好嘞，既然香港實行普通法，喺未有證據顯示學生吸毒之前，理論上人人清白。即使有疑似High到爆嘅學生哥斷到正一正，上到法庭都要由控方提出確鑿證據先至可以定罪，否則疑點利益歸於被告，學生哥一樣無罪。試問，曾蔭權憑乜嘢一口咬定差不多每間中學都有學生吸毒？煲呔曾咁樣講法，未有真憑實據就假定學生有罪，係咪破壞法治精神呀？係咪破壞一國兩制呀？唉，呢鋪更加死得，真係唔死唔得！

其實講到尾，成個校園驗毒計劃波折重重，反對聲音此起彼落，其中一個主要原因正正就係「假定有罪」。學生哥認為你橫蠻無理吖嘛，覺得你先入為主認定個個都係毒犯，唔理三七二十一人人捉入廁所除褲驗尿，好唔尊重啫。所以咯喎，驗毒計劃從第一日開始就諸多阻滯。即係咁，人人贊成打擊毒禍，冇人願意見到毒品入侵校園，不過政府嘅做法太過粗疏，冇仔細考慮過學生感受。

設身處地諗一諗吖，如果有人衝入禮賓府，要求屋主交出一泡尿攞去化驗，煲呔曾會有乜嘢感受吖？又假如，有人聲稱，全香港差不多每個政府部門都有公務員吸毒，煲呔曾又會有乜嘢諗法吖？嗱，你唔好死撐話從來冇公務員吸毒呀，上個月先至有一個署任警長知法犯法，既吸毒，又販毒，先由廉署拘捕，再由法庭定罪。

點都好啦，都係嗰句，打擊毒禍舉腳贊成，不過未諗到周全辦法之前，唔該曾蔭權唔好口不擇言噏得就噏！