當年WK背着太太與女性朋友布穎琪同遊日本，被傳媒捉個正着，政壇好先生形象扣晒分。WK尋日向學生介紹自己時，主動引述維基百科有關佢嘅描述，來個自我引爆，承認當年搞婚外情係事實，學生見佢答得咁坦白，趁答問環節時窮追不捨，問WK有否後悔搞婚外情、付上代價係咪太大？

「唔係講句負責就得」

本來WK想帶學生反思人生意義，點知話題扯開晒，但WK並無迴避，仲來個真情剖白，話婚外情事件發生後承受好大壓力，最困難唔係面對傳媒及作出遞信辭職嘅決定，而係唔知點面對家人：「至親人士所受嘅傷害，唔係我講句『我負責』就可以彌補到！」講到呢度WK忽然沉默咗十幾秒，幾乎想喊出嚟！

WK無講事後點處理呢段三角關係，只透露依家係住家男人，單係處理家頭細務已周身唔得閒，最新嗜好係學日文同上佛學班，睇嚟WK已看破紅塵修心養性，唔再入「花叢」嘞。咁會否學某啲高官咁下海從商？WK笑言依家生活唔算窮，做又得，唔做又得，若然新工作唔牽涉利益衝突，會考慮吓喎。當年領軍搞奧馬，總算有交代，問到今日嘅東亞運，佢就唔想評論，WK話退休後連報紙、電視都少睇，寧願做蛀書蟲，所以唔知東亞運搞成點喎！