本文重點
代理名錶Franck Muller嘅Sincere Watch （HK） Limited副主席周國勳（Kevin），佢太太周譚蕙菁（Reina）喺名媛圈子中向來都係低調分子，無論佢現身Ball場抑或係做慈善，都唔鍾意張揚、高調，就好似佢嘅衣着打扮咁，講氣度講含蓄美。早前Reina着咗套Silhouette極富Volume嘅新裝去私人派對，無論線條同埋Detail都係今季嘅潮流，同場唔少闊太都問佢件衫係乜嘢牌子、喺邊度買，原來Reina同佢最愛嘅本地時裝設計師張潔雯（Bonita）合作推出Ni-Chi牌子，件衫正係最新嘅設計。
以囡囡命名
Reina同Bonita第一個處女作仲畀咗中環名店Harvey Nichols老闆娘余桂珠，嚟緊仲有機會傾埋，打算擺喺英國倫敦嘅Harvey Nichols，實行衝出香港、空降倫敦。
早幾日Bonita喺Harvey Nichols出現，一路講電話一路巡視業務，仲好仔細研究啲衫嘅擺設。卓妮上前問起佢同Reina合作嘅Ni-Chi搞成點，點知Bonita轉頭就約咗Reina嚟，仲傾起大家合作嘅經過。其實Reina識咗Bonita八年，一直搵佢做晚裝Gown，兩個女人坐埋一齊交流時裝，都係追求經得起潮流考驗嘅設計，唔使一定要大牌子，但必須講究用料同剪裁，放喺衣櫃十年後拎番出嚟着都仲得；大家理念相同，早幾年已有意思合作，終於喺半年前的起心肝，拍板搞時裝。
拍板後，下一步就係為品牌改名，原來Ni-Chi呢個名，都係兩個廿四孝媽咪嘅靈機一觸，Bonita用咗囡囡Nicole嘅「Ni」，Reina用咗囡囡周穎詩（Chelsea）嘅乳名「Chi」，合而為一就為品牌命名為「Ni-Chi」。着名牌着得多，將自己嘅設計變成時裝都係第一次，Reina本着「鍾意我哋設計嘅人自然會鍾意」嘅理念去做，將自己同Bonita鍾意嘅時裝元素夾埋一齊，出嚟嘅風格正如佢形容，「係基本款式但又有啲唔同」。
Bonita就認為巿場非常大，每個人都有唔同品味，好難兼顧所有人嘅需要，當然價位由幾千至幾萬嘅製成品，都包含咗好多潮流元素，完全反映佢哋嘅Fashion sense啦！Reina仲話佢個囡囡未讀完書出嚟賺錢，冇錢幫襯佢做佢第一個客；Bonita就話囡囡幾歲大仲細，未着得落大人衫咁話。
卓妮