本文重點
立法會議員涂謹申再婚消息傳出後，唔少人紛紛恭喜佢，尋日準新娘正式向全體立法會議員廣發「紅色炸彈」。阿涂結婚不忘立法會，張喜帖上印有兩人以立法會為背景嘅婚紗照，覓得第二春嘅阿涂翹住未來老婆蘇麗芬，笑到好似執金咁開心，身為基督徒嘅佢仲喺喜帖上印上聖經金句：「兩個人總比一個人好，因為二人勞碌同得美好的果效。若是跌倒，這人可以扶起他的同伴。」阿涂似乎想話畀大家知道，再婚係想搵番個老伴，白頭偕老。
12月12日12時註冊
阿涂揀咗十二月十二日中午十二點喺香港仔深灣道嘅深灣遊艇俱樂部地下嘅池邊帳篷舉行註冊儀式，之後擺個午餐酒會，過兩日即係十二月十四日晚再喺同一俱樂部嘅宴會廳擺喜酒招呼親友。據聞白鴿黨兄弟傾巢而出為阿涂搞氣氛，身為律師嘅黨主席何俊仁將會做證婚人，黃成智就賣關子話有秘密任務，唔知到時會否喺會場搞示威抗議呢？