雖然佢講得好謙，但問到樓市有冇泡沫時，佢就心水好清：「好難講依家嘅情況係冇泡沫，（泡沫）亦係資本主義特色，冇人可以干預，總之賺蝕都係投資人負責。」佢仲話，本港係小型經濟體，好睇美國及世界頭，即係美國同世界嘅經濟走勢對本港影響好大，佢仲覺得美國經濟似乎已露出復甦勢頭。

養生靠三不

當晚酒會好熱鬧，年屆八十六歲嘅蔣震不時喺場中穿梭應酬，活躍到完全唔似一個八十幾歲嘅長者，問佢有乜養生秘方，蔣震笑笑口話：「我嘅秘方人人都做到，『三不』就得，不煙不酒不夜生活。」不過佢呢個「三不」，要做得到都認真唔容易。蔣震仲每日堅持散步四十五分鐘，吸收新鮮空氣又活動吓身體。咁幾時退休呀？蔣震碌大對眼話：「我哋私人公司老闆只有做到死嘅啫！」講完之後，佢都補充番，家吓有仔女幫手，返工時間比以前少咗好多囉。