影大合照 催下屬快啲

天寒地凍，其實一眾嘉賓都做好保暖措施，好似四叔厚西裝加冷衫同頸巾，李佩雯就笠埋頭巾防止入風，身穿Gucci大褸嘅子淇就依偎在老公家誠身邊取暖，科大顧問委員會主席陳祖澤就穿着大絨褸，恒地旗下香港小輪發展部董事鍾麗幗仲着埋皮草添！可惜校園風勢強勁，四叔被風吹到頭髮亂了，致詞時猛索鼻水，臨尾大合照時仲催促下屬快啲上台，減少食風時間，四叔入番室內即刻要飲番杯熱茶添！

纜頸巾	捧熱茶	擤鼻涕

四叔致詞時「三句不離老本行」，大讚科大擴建校園塊地皮背山面海，環境優美，仲係海景添，地皮面積約一百萬平方呎，佢話如果興建低密度別墅，價值應該超過五十億元，實在千金難買！四叔話，既然有咁嘅地皮做校園，學生就要好好珍惜，畀心機讀書，將來為香港和國家繁榮出一分力！四叔最後仲恭賀科大校長陳繁昌「新官上任」，寄望陳校長領導師生為科大再創佳績。

李兆基（左三）捐錢畀科大擴建校園，大女佩雯（左五）、二仔家誠（左四）及新抱徐子淇（右）、得力助手林高演（左）齊撐場。	四叔大女李佩雯尋日由頭包到落腳保暖抵禦寒風。	年前由高官過檔恒基旗下香港小輪嘅鍾麗幗，着住皮草去撐老闆四叔。

子淇同伯父劃清界線

徐子淇近日又因伯父嘅財務糾紛被捲入是非，子淇尋日劃清界線，重申事件與她及父親全無關係，從小到大好少與伯父聯絡，甚至無伯父嘅聯絡電話。子淇仲話，「邊個啱邊個錯都唔知道」，最好用合法途徑解決，佢哋已交由律師跟進事件。至於會唔會擔心人身安全，請多幾個保鏢，子淇好淡定話：「咁又唔使，做人行得正企得正，沒必要擔心！」