沙田西林寺啱啱維修完，果然係舊貌換新顏。有人斥巨資將古寺變做五幢骨灰龕堂，骨灰龕位以每個二萬到二十萬蚊向市民兜售，由於呢度鄰近港鐵站，風景又正，所以銷情甚佳。

香港啲骨灰龕位向來緊張，買到梗係開心啦。點知地政總署話，西林寺經營骨灰龕位屬違法，土地契約列明嗰度唔可以存放或者儲存骨灰龕，勒令停止經營，如果繼續違規，連幅地都可能要收番。

港府乜咁大整蠱呀？西林寺改建工程做咗幾年，當局居然唔知已經變咗骨灰龕堂，而且有人非法出售骨灰龕位亦唔係一日兩日嘅事，地政總署月初先至發出警告信，但又冇採取行動，更冇話畀市民知啲骨灰龕位到底買唔買得，簡直就係靠害。

更加離譜嘅係，由沙田地政處去西林寺行兩步就到，依家估計有千幾人買咗非法建造嘅骨灰龕位，當局睇住市民中招都唔做嘢，同縱容違法有乜分別？你話港府係咪累人累物吖！

一向唔踢唔郁嘅食衞局局長周一嶽喺事件曝光後話，會向地政總署了解詳情，但係就冇講清楚市民可唔可以購買呢啲骨灰龕位，噏咗等於冇噏。佢仲話，「一直認為香港骨灰龕不足嘅問題要解決」。

鬼唔知阿媽係女人咩，骨灰龕嚴重短缺問題嘈咗Ｎ年，周一鑊亦「關注」咗Ｎ次，但係問題一直冇得到解決，咁又點解釋吖？

兩個月前，被列為地質公園嘅大埔三門仔馬屎洲就揭發一單未經申請改變土地用途個案，有人喺私人農地大興土木建造「墓園」，石板、神像、祭壇、墓碑乜都齊，仲賣埋骨灰龕位。農地改變咗用途，「墓園」合唔合法，當局竟然一直未有定論。

除此之外，有人甚至將工廠大廈改為骨灰龕堂，對附近居民構成極大滋擾，當局同樣係唔監唔管。前排發表嘅施政報告建議活化工廈，周一鑊仲叻唔切，話要研究將空置工廈改為骨灰龕堂，結果又畀人炳到七彩。

本地未來十年對骨灰龕位嘅需求估計有三十到四十萬個，但供應量只有十萬個左右。供應長期不足，缺口愈來愈大，搞「十大基建」、「六大產業」就話大陣仗啫，估唔到建骨灰龕堂都咁難，你話呢個政府要嚟做乜吖！

唉，香港地連一個骨灰龕都冇地方放，搞到寺廟、農地、工廈骨灰龕遍地開花，真係生不安寧，死不安息，咁落去，「紐倫港」咪使旨意喇，亂葬港就有一個。