機場混亂 隻字不提

心水清嘅人都知道，近年每逢民主派有大嘢搞，民主阿婆都會出嚟噏三噏四博曝光。民主阿婆尋日走到東涌出席一間學校嘅頒獎禮做演講嘉賓，佢致辭時一開始就自爆，呢次係佢第一次走到東涌嘅學校，仲懶自豪話東涌係佢嘅「baby」，因為東涌都係十幾年前隨着興建新機場而發展出嚟。對在場唔少都係十幾歲嘅中學生嚟講，未必會知道，新機場喺九八年啟用初期出現大混亂，佢責無旁貸，可惜民主阿婆對呢段歷史隻字不提。

民主阿婆更乘機暗踩煲呔曾，記得月初煲呔曾喺商界聯合午餐會上，話面對外界批評每晚仲瞓得好好。民主阿婆就話無論做咩都好，做人要接受挑戰，有需要嘅時候唔好怕表達意見；如果想夜晚瞓得好，就必須對家人、同事都有忠誠。真係一句就夭中煲呔曾死穴。

不過話時話，以前民主阿婆同煲呔曾情同姊弟，依家就真係反轉豬肚囉！