本文重點
由十二月底開始，全港五類高危人士逾三百萬人口可以開始打豬流感針，呢隻疫苗好新，內地又有人打完之後死咗，唔知同隻疫苗有冇關係，難怪大家心大心細，都唔知打唔打好。作為全港公共衞生之首嘅食物及衞生局局長周一嶽，尋日上電台時畀市民問到口啞啞，唔敢寫包單搵高官做人辦。
只話自己一定打
市民葉先生打電話上電台節目質問周一嶽，既然大家都好擔心豬流感，咁政府會唔會加多一類高危人士，連特首、局長等政府高官都一齊打呢？話晒班高官咁高貴，對香港人又咁重要，咁點解佢哋唔身先士卒呢？
殺到埋身，周一鑊唔答都唔得，佢話自己一定會打，因為佢有帶頭作用，希望所有醫護人員都打。咁其他高官又應唔應該打呢？周一鑊就好似好有權威咁話：「我哋覺得自己唔應該有特權用呢的政府資源先，而特首呢，我相信佢都可能係高危人士，因為佢啱啱過六十五歲生日，其他官員當然睇佢自己意願啦！」周一鑊咁講法，說到底都係唔敢搵高官做人辦啫！佢仲話，其他官員的確可以自己去私家醫生處畀錢打，但頭一批針都希望畀高危人士先，唔會畀私家醫生自由咁同佢哋病人打喎。