任總退休後表明心迹，心繫祖國，佢坐言起行，前日獲科大頒授工商管理榮譽博士學位之後，即刻飛去上海，為復旦大學演講，大談國際同內地金融市場格局形勢，幫一班工商管理碩士生開竅，尤其剖析內地金融體系面對嘅新挑戰，分析全面，見解精闢，可見任總真係心繫內地金融市場。任總亦不作矯飾，喺結語話，退休之後，對學習點樣hea（悠閒）着過日子，可惜苦無寸進，反而喺保持對貨幣同金融嘅個人興趣，則游刃有餘。任總咁講，即係暗示復出有心有力。

弦外之音 驟添懸念

事實上，自今年五月任總退休消息傳出，金融界已經流傳任總將會出任中國人民銀行顧問，甚至由中央出手，支持出任國際機構要職，好似國際貨幣基金組織或者世界銀行咁，消息一度甚囂塵上。其後，任總亦多次喺公開場合表明心志，有意為香港及內地嘅金融市場繼續燃點餘暉，發光發熱。點知消息傳咗半年，任總退休都過咗一個多月，但係一直未有落實。

任總尋日演講之後，被記者問起，重申願為國家或香港金融領域作出貢獻嘅宏志，不過，佢再補多一句：「呢啲可能係我嘅一廂情願嘅啫！」呢句話可圈可點，唔知有冇乜嘢弦外之音？任總北上發展第二春，即時驟添懸念。

任總喺香港金融界舉足輕重，如果真係獲人行延攬，或者好似前衞生署署長咁做世衞總幹事，層次就更上一層樓，真正成為任總口中嘅「升呢」之作。

不過，任總嘅去向時至今日只聞樓梯響，任總又有「一廂情願」之嘆，睇嚟事情可能仲要多等一陣喎。