本文重點
今年係男拔校慶一百四十周年，校方搞咗連串大型慶祝活動，唔少校友都返去撐場，尋日喺男拔草地就舉行咗個露天音樂會，可以話係百幾年來第一次，連六五年畢業嘅林子祥都返咗去表演，卓妮都去咗睇吓，點知仲有意外收穫，就係撞到前環境運輸及工務局局長廖秀冬，到底冬冬同男拔有乜關係呢？原來冬冬嘅二公子蕭偉中（Justin）九五年喺男拔畢業，尋日仲返母校同阿Lam一齊夾band添！
細細個有讀寫困難嘅Justin，全靠冬冬諄諄善誘下克服障礙，依家成為成功音樂人，呢份母子情深，感動好多人。不過尋日同Justin傾偈，佢竟然話依家成日都唔知媽咪去咗邊，亦唔會點理喎，因乜解究兩母子咁疏離？原來Justin話自己已經大個，亦都希望媽咪有自己空間，所以先唔特別問。但Justin都知道冬冬經常到大陸、美國幾邊走去做義工，唔係冷落媽咪；囝囝咁懂事，抵冬冬咁凍都去睇Justin表演嘅！
阿Lam同男拔校長係同學
與Justin同場演出嘅阿Lam，原來係現任男拔校長張灼祥嘅同班同學。阿Lam憶述讀中學嘅日子，話佢同張校長當年都係怕羞仔，所以一直都唔係咁熟絡。直至四、五年前張校長為搞籌款活動而初次接觸高爾夫球，一試就愛上，先開始同高球發燒友阿Lam一齊打波，再續佢哋嘅同學情誼。
卓妮