本文重點
女人無論幾理智，都難以抵擋珠寶首飾嘅誘惑。基本法委員會副主任梁愛詩衣着打扮向來簡潔，甚少珠光寶氣，但原來詩姐同好多女士一樣，都鍾意置番幾件「碼頭」傍身。卓妮爆多樣嘢畀大家聽，有次詩姐原本諗住攞件首飾去珠寶店維修，點知被店內賞心悅目嘅首飾氹到心花怒放，結果荷包大出血！
詩姐早前悉心打扮為獅子會午餐會演講，見她依舊穿着沉色套裝，但細心觀察發現她身上飾物好特別，原來係一個紅珊瑚製作嘅傳統童子造型襟針，頸喉位就掛上花形紅珊瑚，與襟針相映成趣；而手上戴咗隻Patek Philippe（百達翡麗）名錶。
詩姐話身上飾物都係購自上世紀七十年代，紅珊瑚購自台灣，擺到最近先搵碎鑽石鑲起做襟針，佢話當年紅珊瑚唔係好貴，但現在乜都講保育，價值可能提升咗都未定。紅珊瑚係珍貴寶石珊瑚，近年買少見少，愈深色就愈靚，價值由數千至數萬元不等，睇詩姐塊紅珊瑚擺咗幾十年都唔甩色，就證明係天然靚嘢啦！
揀十幾分鐘笑住離開
卓妮早排途經中環太子大廈商場，見詩姐在丹麥百年名牌首飾Georg Jensen店內左睇右睇，期間對一個減價貨品專櫃特別有興趣，一邊睇到托晒腮，一邊笑得心花怒放。揀咗十幾分鐘後，詩姐攞住一個精美盒仔笑住離開。
原來詩姐係Georg Jensen熟客仔，嗰日原本打算攞個心口針去店舖維修，但睇睇吓又買多對銀耳環，價錢同款式就不便透露嘞。卓妮在店內兜咗一圈，發現啲耳環都唔平，拿埋都要五千幾元，過萬元嘅首飾更比比皆是。即係話，詩姐當日最低消費都四位數字，所以話女人錢係最易賺嘅。
卓妮