香港豪宅炒到失控，連大學校長都呻買唔起樓，人稱扮嘢文嘅「蘭桂坊之父」盛智文都話，依家入市買豪宅「制唔過」，反而瞄準四川市場，半年前喺成都狂掃十九幢物業，租畀商戶建立「成都老蘭」。扮嘢文分享發達錦囊，話投資最忌衝動，時刻提醒自己入市之前唔係諗賺幾多，要計蝕幾多，咁就包保唔會買錯嘢。
扮嘢文早前出席一個頒獎活動，分享建立品牌心得，佢話推銷品牌就好似賣時裝咁，要不停轉、轉、轉！墨守成規一定死梗。不過講到投資，佢就絕不跟風，仲要人棄我取。近年豪宅市道炒得瘋狂，扮嘢文反而喺年初以二千六百萬元沽售淺水灣豪宅，勁賺約千三萬，之後未有再入市，理由係樓價已經升得太高，係時候走人。
佢坦言投資最忌喺高位同人搶貴貨，就算搶到都唔夠買驚風散，寧願趁市場出現兵荒馬亂，人人搶住掟貨時先至大舉入貨。
扮嘢文靠白手興家至有今日嘅成就，投資心得絕對有參考嘅價值。大家想學扮嘢文咁發達都唔係太難，就係要沉得住氣，千祈咪羊群心態喎！