搞乜鬼？良乜朋？互乜愛？哦，冇嘅，羨慕警隊鴛鴦可以執勤期間順便遊山玩水之嘛。有郎情妾意一男一女警員喎，着住制服佗住槍，踩住單車巡緊邏，居然因利乘便玩轉大埔，沿途煙煙韌韌自拍溫馨合照。間中警花客串o靚模，任由男警悉心擺布，你未必可以話係搔首弄姿，不過絕對可以講係花枝招展。你知啦，制服誘惑呢家嘢，有時真係引到大小麻甩流口水㗎。

拍拖更逍遙遊之所以會曝光，原因係唔知邊個咁戇居，居然將成輯私人相簿公然放上交友網站Facebook。相簿標題註明係十一月七日大埔區單車巡邏，全輯相片總共三十七張，包括四張男女警合照、十六張女警獨照、兩張男警獨照以及十五張風景相。至於郊遊景點，犀利咯，覆蓋範圍由大埔滘單車徑一直去到海鮮勝地三門仔，包括吐露港海邊碼頭、大埔海濱公園、港鐵鐵路同埋三門仔漁民新村等等。

如果你要功夫茶為呢一趟執勤拍拖郊遊樂做一個總結，功夫茶會醒你四粒字：戇郊之旅。

喂，你假公濟私又好，你公器私用又好，你蛇王偷懶都好，你自己唔攞出嚟獻世，外面邊個會知吖？好似冇耐之前嗰一單水警輪暢遊蒲台島事件咁，「海鮮團團長」打死唔認濫用職權，更加唔會蠢到自拍靚相放上網，如果唔係「深喉」踢爆，記者明查暗訪，成件事咪可以瞞天過海囉。

咦咦咦，咪住先，男女警員執勤期間嬉嬉鬧鬧玩世不恭，係就係假公濟私，不過好似冇公器私用喎，拍攝工具如無意外係私伙嘢，打得火熱嘅癡男怨女又冇攞支警槍出嚟擺甫士。呢嗱，大家細心諗一諗，佢哋當時係負責單車巡邏，單車本來係用嚟捉賊嘅，點知變咗「互愛坦率相向何必多嘢想」嘅拍拖工具，你話係咪公器私用先？你話係咪同水警輪變咗私家遊艇差不多先？

對於呢一單春色無邊嘅拍拖更事件，警務處副處長（行動）任達榮證實，兩名警員當時係當值嘅，佢又話會展開紀律調查，如果發現有人違規，將會嚴肅處理。

唉，嚴乜鬼嘢肅吖，處乜鬼嘢理吖，功夫茶清楚記得，自從舊年發生駭人聽聞嘅警員強姦民女之後，警方今年年初高調成立「誠信管理委員會」，企圖挽救江河日下嘅警隊形象。可惜吖，誠信管理好明顯非常失敗，否則唔會陸陸續續爆出醜聞，衰完一鑊衰多鑊。

其實除咗誠信管理之外，警隊更加有必要做好智商管理，「戇郊之旅」絕對係大腦運用出咗好大問題，邊有人咁蠢自暴其醜㗎！