點解會咁可憐嘅呢？點解會咁可恨嘅呢？根據目擊者所講，初步相信離唔開一個最主要嘅原因，就係高速掟彎。大家請留意，係高速，唔係超速。事發現場係寶順路迴旋處左轉入唐明街，時速限制係五十公里。專家估計，肇事巴士當時係以時速四十公里掟彎，理論上唔算超速。問題係，現場係一個急彎，重型車輛只適宜以時速三十公里以下入彎，一過咗呢個速度就好容易翻側。

好嘞，既然唔係超速出事，而係高速惹禍，即係乜嘢意思呢？好明顯嘞，第一個罪魁禍首當然係冇減速入彎嘅巴士司機，而運輸署亦難辭其咎，道路設計出咗好大問題，一來冇將時速限制降低，二來又冇足夠減速指示。最離譜嘅係，車禍之後運輸署官員第一時間跳出嚟推卸責任，佢哋話喎，車禍現場嘅道路設施安排恰當，有清楚標記顯示車速限制！

喂喂喂，都話出事原因係高速掟彎咯，並唔係超速駕駛，你話現場有清楚標記顯示車速限制係咪廢話呀？呢個五十公里車速限制可能仲有誤導成分，巴士司機心諗，運輸署都話時速唔超過五十公里就冇問題，咁咪四十公里掟個靚彎囉，結果咯喎，砰砰嘭嘭撞大板。

至於講到超速，原來出事現場確係超速熱點，警方今年已經喺同一路段檢控咗接近三千宗超速個案。咁，又即係乜嘢意思呢？計功夫茶話齋，運輸署如果唔盡快改善道路設計同埋指示標記，以後一定死得人多，原因好簡單，巴士冇超速已經搞到死傷枕藉，一旦超速掟彎，後果不堪設想！

運輸署固然難辭其咎，九巴公司都好有責任。有乘客話，平日搭六九二號由中環去到出事現場起碼要四十五分鐘，嗰一程「死亡之旅」足足快咗十分鐘，懷疑司機全程超速。呢嗱，家陣講嘅係超速嘞，唔係高速。司機因乜事趕頭趕命呢？係咪九巴編更有問題呢？司機會唔會係爭取休息時間呢？唔該九巴好好檢討，或者咁都得，九巴高層自摑九巴掌謝罪。

咦咦咦，咪住先，其實運輸署都要自摑九巴喎，鬼叫你道路設計失誤呀！

點都好啦，運輸及房屋局局長鄭汝樺，麻煩你做番一齣好戲，切實責成運輸署改善道路設施，狠狠要求九巴加強監管，如果唔係，呢邊亡命小巴，嗰邊亡命九巴，香港人何來咁多眼淚喊到肝腸寸斷！