立法會研究雷曼事宜小組委員會尋日召開第廿二場聆訊，第五次傳召金融管理局副總裁蔡耀君作供。可能尋日嘅聆訊比平時早咗半個鐘，加上三粒鐘嘅聆訊太過沉悶，委員象哥黃定光頂唔住睡魔急call，喺議事堂內猛咁釣魚。另一名委員自由黨副主席方剛更索性退出小組，專心處理其他立法工作。
尋日嘅聆訊朝早九點半開始，主要圍繞不獲回購嘅非迷債苦主問題。全場一聲不發嘅象哥，不知不覺進入咗夢鄉，三個鐘之後精神奕奕步出議事廳，佢話自己有啲攰，因為前晚瞓得唔係幾好囉；其實象哥之前患過睡眠窒息症，仲為此做過手術添，肥人都有肥人嘅煩惱。至於上個月尾已退出小組嘅方剛就話，要問嘅早已喺之前嘅聆訊問咗，加上今個年度唔少濕滯法例要處理，好似最低工資同競爭法，所以無謂分心啦。