下周三就係立法會議員李華明結婚廿五周年，肥仔明尋日爆料，話請咗多名黨友出席一個迷你派對同太太慶祝，其中下月再婚嘅涂謹申就慨嘆，肥仔明轉眼就結婚廿五年，佢就要從頭計過，唔知有冇咁長命捱到銀婚紀念。高達就話佢同現任太太陳樹英都係八四年結婚，不過肥仔明就立即窒佢，話高達同阿樹中間曾經離過婚，根據立法會計算議員資歷準則，中途落車就要重新計過，唔算結婚廿五年喎。
肥仔明話，下周三立法會冇乜爭議性議程，如無意外傍晚七、八點鐘就收得工，唯一擔心係煲呔曾會喺當日到立法會發表聲明公布政改方案，咁佢個銀婚派對就唔知點算好。佢記得當年自己原定喺十一月十一日註冊，貪日子夠晒易記，可惜最後排唔到期，要順延一個星期；阿涂今次揀咗喺十二月十二日中午十二點註冊，希望佢唔會因為大頭蝦誤咗吉時喇！