坐咗香港天文台台長個位啱啱半年嘅李本瀅，上任以來周圍去學校、落社區講解全球暖化問題，講得Talk多口才當然有番咁上下。尋日佢帶埋一班助理台長同科學主任，同各大傳媒機構嘅記者傾吓偈，佢落力介紹天文台各款測量儀器，同佢嘅同事一齊，十足十係一個top sales嘅團隊。
最近廣東旱情持續，李台長當然要講下本港未來嘅降雨量如何，香港會唔會都有制水嘅危機等，但係佢好快就將話題轉咗去天文台嘅儀器點樣威水，不論係新儀器定係舊技術，佢都搬晒出嚟介紹一番。
當李台長沉醉於講解各種儀器時，有記者問佢有關市民中暑嘅數字，佢竟然當堂Ｏ嘴答唔出。台長畢竟係科學家，但科學都係為人服務嘅，對於中暑呢啲較為超出佢工作範圍嘅問題，就被考起咗，佢只係話佢早排曾經響blog裏面寫過有關數字，叫記者自己去睇番喎。