「美食教主」梁許安璞（Annie）尋日出第三本烹飪新書，Annie人緣甚廣，公大前校董會主席李業廣、教育局局長孫明揚伉儷、行會成員張建東等名人畀面撐場外，當然少不了身為公大校長嘅老公梁智仁同佢嘅哥哥梁智鴻伉儷。不過梁校長邊招呼嘉賓邊睇錶，似乎係趕下場。到底有乜約會緊要過老婆嘅簽名會呢？之唔係趕住去香港會「面試」囉。原來梁校長正申請加入香港會做尊貴會員，尋日首次會見遴選委員，所以老婆都要借歪嘞。
Annie尋日喺金鐘間Kelly & Walsh書店舉行出爐新書簽名會，佢話寫書壓力大，以後寧願周遊列國拜師學廚藝仲好玩。老公梁校長同佢一樣，想做就去做，為方便喺中環多個落腳點，近日遞紙申請加入門檻甚高嘅香港會，行會成員張建東唔單止出面提名佢，尋日去完梁校長太太許安璞嘅新書簽名會，仲陪埋校長去見Board，所以梁校長撐咗老婆大半粒鐘後，急急腳直奔香港會。
香港會出名難入，會員都係精挑細選，候選人要輪流會見廿二位遴選委員，梁校長尋日就見咗香港會現任主席陳祖澤及前主席陸鍾漢等人，「面試」大約四十五分鐘。梁校長話無乜尖銳問題，主要係傾吓偈，互相認識吓喎。其實出身富裕嘅梁校長，早已係粉嶺高球會、馬會同鄉村俱樂部嘅尊貴會員，不過話晒香港會會員係身份象徵，畀十幾萬攞多個會籍又何妨呢？