呢兩個月政商界喜事一浪接一浪，除咗有兩個議員做「老襯」外，新世界集團主席鄭裕彤長子嫡孫鄭志剛（Adrian）亦鐵定於本周六（十四日）舉行世紀婚禮，與去年中訂婚嘅未婚妻余雅穎（Jennifer）共諧連理，當日早上一對新人會先在聖約翰座堂行禮註冊，晚上再在灣仔會展新翼大禮堂大排筵席，作為阿爺嘅彤叔和父親純官終於望到飲呢杯新抱茶喇！
橙色喜帖 設計簡約
卓妮記得Adrian去年中在新世界旗下嘅灣仔君悅酒店Pool side舉行浪漫訂婚派對，當晚有六百名政商界名人朋友出席見證，當中不乏三十歲出頭嘅富豪二代及青年才俊，場面盛大，所以可以想像本周六大婚兩場盛事規模將會更壯觀，富豪幾代濟濟一堂，加上冠蓋雲集，難怪Adrian要幫襯番家族旗下公司管理嘅會展新翼大禮堂擺酒，筵開逾一百席包無走雞。九七年香港政權移交儀式都喺呢個大禮堂舉行，所以當晚絕對係世紀婚宴。
新世界發展尋日正式發新聞稿將Adrian及Jennifer嘅大婚喜訊公告天下，仲預告今次婚禮保安嚴密，傳媒需在指定範圍內採訪。據聞城中富豪名人兩個月前已陸續收到一對新人發出嘅橙色喜帖，喜帖設計簡約，並通知貴賓好友可在婚禮前到指定嘅兩間高級百貨公司認購結婚禮物，所有禮物會由專人送到鄭家府上，方便又快捷。
結婚禮物 實用為主
卓妮睇過其中一份禮物清單，大部分以家居實用品為主，包括床上用品、沐浴用品、家具、家居擺設、廚具等，床上用品被鋪貴到二萬八千元，廚具亦有平到四百一十元一個嘅陶瓷碗，其中一個名為「Diva Vase」水晶花瓶價錢高達二萬八千八百元，成為最貴一件禮物。不過，送禮都係講個心啫，平貴都無所謂，物輕情意重嘛！
新娘子Jennifer向來低調，到目前仍未有在公眾場合曝光，只知道她係前跨國投資公司高層，但幾個月前已離職，疊埋心水嫁入鄭家做少奶奶。據聞Adrian工作太忙，不但要押後度蜜月，即使今次世紀婚禮籌備都要主力由Jennifer負責，唔怪得早前Adrian話籌備婚禮方面會「精神上無限支持」啦，原來係咁嘅原因。
卓妮