肥平尋日去樹仁大學演講，題目開正佢嗰瓣：「香港文化政策及傳承」，由香港開埠港英政府採取放任自流文化政策，一直講到回歸後民政事務局嘅工作，一講講足一百年，內容如汪洋大海。

話中有話夠精深

不過，心水清嘅同學仔，就會聽得出肥平講嘢話中有話，示範緊中國文化中最博大精深嘅罵人文化。

離開政府之後成日現身傳教活動、曾經為正生學生喺大氣電波公開流眼淚嘅肥亨，過咗一年「過冷河」期限，答應擔任中策集團非執行董事兼主席，肥平被記者問起點睇呢件事，佢一開腔就話：「喔！我以為馬局長專做慈善活動嘅？」嗱，好明顯若有所指喇。

肥平似乎意猶未盡，上台正式演講時，順手玩埋前老細煲呔曾，當講到特區文化政策，指民政事務局兼管藝術同文物兩大文化範疇，所以古物古蹟辦事處一向都隸屬民政局之下，但○七年之後，古蹟辦調到發展局管轄範圍，肥平仲形容「呢個係比較怪雞嘅安排」，擺明寸緊煲呔曾唔識文化兼無文化。

問起西九把幾火

到台下答問環節，先至係全場高潮所在。有同學問肥平點睇西九文化區遲遲未動工，到依家仲曬緊草皮，肥平一聽，唔問猶自可，一提把幾火，即刻好似火山爆發咁連珠炮發，批評依家嘅西九計劃閉門造車，「匿喺象牙塔做嘢」。

佢話，香港應該發展「大西九」概念，將視野放喺整個大中華同東南亞，「香港嘅西九要同深圳嘅西九、廣州嘅西九、東莞嘅西九、中山嘅西九合作」，市場係內地腹地，唔係香港彈丸之地。肥平咁講，係咪寸緊負責西九項目嘅唐唐係井底之蛙呢？

其實，肥平當年擔任民政局局長，都有份參與統籌規劃西九，不過當時西九進展緩慢，幾年幌眼過去，直到佢離開政府，計劃都無大進展，唔知係計劃本身有問題，定係當時政府有意拖住先，總之外界評語麻麻。

所以尋日學生多次追問肥平點睇西九咁多年嚟一直歎慢板，其實亦有翻肥平舊帳嘅意味。肥平突然發炮鬧政府，唔知係咪好快有新搞作？