尋日喎，有市民推住ＢＢ車「慢駛遊行」，由中環愛丁堡廣場一路遊行到政府總部，抗議香港空氣質素惡劣，要求曾蔭權喺餘下任期之內落實世衞嘅《空氣質素指引》，設立改善空氣質素時間表。

煲呔曾有乜回應呢？好似暫時未見有任何回應，可能係基於兩個原因啩。第一，曾蔭權出晒名係「氣候逃犯」，一見你話要求改善空氣質素，個頭縮都縮唔切，當然睬你都傻。第二，乜嘢叫做「餘下任期」？呢個問題非常深奧，正常嚟講曾蔭權要到二○一二年先至夠鐘鬆人，之不過咁，近日由於慳電膽風波觸發倒曾怒潮風起雲湧，冇人夠膽寫包單話腳痛落台唔會歷史重演，咁又真係好難回應喎。

睇番相當有新意嘅ＢＢ車慢駛抗議，係純粹搞噱頭，定係有實際需要？原來係咁嘅，美國加州早於○四年立法禁止喺主要幹道一百五十公尺範圍之內興建學校，以免學童受到路邊空氣污染影響，環保組織地球之友就根據同一標準檢視全港九百幾間幼稚園同埋幼兒園。結果係點呢？七個字，弊弊弊弊弊弊弊！

全港十八區九百四十九間幼稚園以及幼兒園，多達四百四十八間處於主要道路一百五十公尺範圍以內，佔整體四成七，涉及六萬七千多個學童。如果分區計算，長期空氣欠佳嘅油尖旺區，九成七幼稚園都喺繁忙道路嘅一百五十公尺範圍以內，涉及四萬名學童。至於學校林立嘅九龍城區，受影響學童比例有六成六，即係一萬二千六百幾人。

老友，假如你身為父母，你忍唔忍心睇住自己嘅心肝寶貝日日呼吸混濁空氣吖？所以咯喎，ＢＢ車慢駛抗議真係有實際需要㗎，環保組織唔係「無中生有」，更加唔係針對曾蔭權「惡意中傷」。至於算唔算「肆意攻擊」就好難講嘞，鬼叫你係「氣候逃犯」咩，緝兇有時真係會重手咗少少㗎。

其中有一位參與遊行嘅家長語重心長咁話，為咗ＢＢ健康着想，要搬去空氣質素比較好嘅西貢區居住。計功夫茶話齋，西貢區嘅樓價以及租金其實好貴㗎，唔係咁多人負擔得起。如果政府高官冇能力又冇意圖改善空氣質素，不如咁嘞，開發蒲台島，等小市民搬入去呼吸新鮮空氣。點解要係蒲台島？冇嘅，連警官都識得公器私用搭水警輪去蒲台島食海鮮，證明呢個小島環境一流，有潛質成為香港最後一塊淨土。

講到尾，唔該曾蔭權落手落腳改善空氣質素救救下一代啦，唔好獨沽一味只係識得亂派慳電膽。至於「餘下任期」到底係幾時，你真係盡心盡力搞環保咯喎，任期咪長啲囉，如果空口講白話吹水唔抹嘴，攞個環保優勢產業呃神騙鬼，任期可以好短㗎咋。即係話，救人等於自救，氣候逃犯闊佬懶理乜都唔做等於危害自己！