西九文化區管理局尋日舉行第二場公眾論壇，吸引咗二百人出席。人多自然意見多，除咗文學倡議小組繼續爭取西九有文學館外，唱男高音嘅市民希望普及歌唱藝術、武林中人想西九包含武術文化，「進念二十面體」行政總裁胡恩威索性大包圍，認為應該咩藝術都關心，最緊要有平台。聽咗咁多意見，最令西九管理局發展委員會主席夏佳理（Ron）醒神嘅，怕且同大牌檔有關。
喺一位居港八年嘅外籍人士眼中，香港特色就係大牌檔同街市，不過佢話兩樣嘢都逐漸消失，希望將來可以喺西九重現。Ron自言係大牌檔粉絲，平時都好興去大牌檔歎番幾味，所以佢都想將來西九有大牌檔。
依家唔少大牌檔都搬咗去街市熟食中心，Ron照樣去幫襯。做過馬會主席嘅佢仲話，其實馬會會所都有大牌檔，事關大牌檔都係講鑊氣啫，而佢就推介沙嗲類菜式。
西九管理局薪酬委員會主席單仲偕話，今個月會面試五、六位西九行政總裁人選，估計今年內請到。希望唔會再有上次返七日工就辭職咁蝦碌啦。