會長選舉向來講「食力」，政綱內容只係「象徵式」。屢敗屢戰嘅呂明華日前已向九十六名現任會董寄出競選政綱，打正口號「服務廠商、服務社會」，政綱有四頁紙，賣字居多，未見有競選靚相，但呂明華牙擦擦咁話：「選舉講理念，你貼張明星相上去都無用。」呂明華戰意高昂，咁David又點呢？

原來佢寄得仲快手！早喺十月尾已寄出政綱，一百一十八位會董候選人亦一網打盡。David份政綱有六頁，比呂明華嘅厚少少，競選口號就主打八字真言——「凝聚、團結、創意、發展」。David話希望集思廣益，畀機會會員發揮所長，唔想搞一言堂喎。

單睇政綱，黃呂之爭難分高下，真正戰場其實係兩人背後嘅智囊團。據聞人緣唔錯嘅David已獲副會長林大輝、施榮懷、常董兼中小型企業商會會長吳宏斌及會董方平等少壯派人馬力撐，本身為「潮州冷」嘅大輝更大打鄉里牌，開到口叫商會內嘅「潮人」支持David，據聞反應唔錯。

陳永棋開口撐黃友嘉

呢邊廂呂明華都唔輸蝕，據聞資歷甚深嘅常董鄭正訓同佢企埋同一陣線，眼見對手獲少壯派聯手，呂明華話未驚過。不過令人記憶猶新嘅係，呂明華年前同林大輝拗手瓜爭奪立法會廠商會議席時，突然喺截止報名前一刻縮沙，今次對手同樣來勢洶洶，佢會選擇背水一戰還是退一步海闊天空呢？呂明華就拍晒心口話：「我會以平常心對待，輸贏好平常。」

廠商會元老級勢力向來甚關鍵，據聞呢班長老已有共識，唔打算出手干預選情。永遠名譽會長陳永棋話，希望今次會長選舉係公平公正公開，元老級人馬唔會意見多多，但話口未完，棋哥忍唔住讚David話：「佢雖然講嘢唔多，其實係實幹派，我認為黃友嘉當選會長嘅贏面極之高。」棋哥講到咁實牙實齒，睇怕會長寶座誰屬，呼之欲出嘞！