港大專業進修學院課程過去有唔少名人修讀過，學院尋日就頒發證書表揚廿五名傑出校友，包括馬會主席陳祖澤（John）、全國人大常委范徐麗泰、前天文台長林超英（黑英）、骨科名醫高永文等。睇番呢班名人修讀嘅課程真係乜都有，最搞笑嘅就係林超英，難以想像佢曾經學過現代舞，仲畀太太笑佢學埋啲嘢最唔正經添！
其實黑英學跳舞已經係上世紀八十年代，當初考慮學邊種舞時，覺得跳社交舞好生硬，又要死記舞步，隨時踩親人，所以選擇學較柔軟嘅現代舞，赤腳就跳得，非常自由，足足學咗半年。學完之後又有乜得着呢？黑英就話好有用，每當欣賞別人跳現代舞時，會容易明白啲。在旁嘅林太就笑笑口話：「佢學埋啲嘢最唔正經㗎嘞！」
阿John讀港大時主修英國文學，當年為何要修讀校外課程呢？原來係為咗七個字：「書到用時方恨少！」。阿John話，大學畢業後加入政府工作，但欠缺實用技能，所以要修讀管理學文憑，對日後工作好有幫助。至於讀書好叻嘅范太，亦曾在六九年修讀人力資源課程，而高永文就修讀過兩年中醫課程，將中西醫學融會貫通。