不過話時話，有時嗰班百厭星君又係過分嘅，父母只不過愛之深責之切，鬧兩句加上少少身體接觸啫，佢哋夠膽死打電話報警「大義滅親」喎，簡直Ｏ晒嘴。

好嘞，掉番轉頭嚟講，香港有冇防止虐待父母法例嘅呢？仔打老竇係咪又會有差人拉嘅呢？丟低父母北上尋歡又算唔算疏忽照顧嘅呢？唔講大家可能冇留意，香港原來係冇法例監管虐老o架 。

虐老問題愈來愈嚴重，嚴重到出得血兼夾死得人。前一排之嘛，唔係話阿仔殺阿媽，就係話阿仔殺老竇。功夫茶可以好肯定咁講，弒母弒父案發生之前，一定出現過長期嘅虐老情況。嗰啲冇人性嘅冷血忤逆仔，十居其九經常攤大手板問父母攞錢，一攞唔到錢就拳打腳踢，打下打下，搞出人命。

根據香港防止虐待長者協會提供嘅資料顯示，今年頭九個月虐老個案高達一千四百宗，比去年同期嘅一千二百二十二宗，上升近百分之十五。之不過咁，有兩個現象非常之咁神奇，絕對不可思議。

第一個現象：社署今年頭六個月接獲嘅虐老個案只有二百二十九宗，比去年同期下跌百分之十九。第二個現象：警方今年頭六個月接獲嘅虐老個案更加低至一百四十八宗。

嗱嗱嗱，你唔好煲呔上身，唔好話香港防止虐待長者協會嘅資料係「無中生有」或者「惡意中傷」呀。人哋收到千幾宗，因乜事幹社署同埋警方分別只有百幾二百宗？最正常嘅推測有兩個可能性，第一：老人家信唔過社署同埋警方，所以即使受盡折磨都唔去搵佢哋求助。第二：老人家冇錯係搵過佢哋求助，可惜吖，社署以及警方敷衍了事拒絕受理。

講到呢度，功夫茶突然諗起天水圍家庭暴力倫常血案，女事主一早覺得自己有危險，一早搵過社工，一早搵過警察，但所有人都掟佢返屋企，亦即係送羊入虎口。結果係點，大家應該記憶猶新嘞，闔家滅門一鑊熟！

同樣道理，社署漠視虐老，警方闊佬懶理，手無縛雞之力嘅公公婆婆咪又係與敵同眠囉，晚晚攬住個唔知幾時爆嘅炸彈瞓覺。

有一單真實個案係咁嘅，八十歲黃伯經常被兒子虐打，先後搵過社工同埋警方，始終冇人施以援手。直至去年三月，黃伯被打到頭破血流，匿喺鄰居屋企避難。經過一番折騰，黃伯嘅乖女同埋女婿終於幫佢安排入住老人院，結束咗一段受苦受難嘅虐老生涯。

功夫茶諗諗下，唔係喇，靠政府保護長者一定死得人多。不如趁早學番幾道散手自衞術，詠春又好，太極又好，跆拳都得，將來老咗咯喎，即使有人虐老都識得還拖吖嘛！