東亞運動會下個月正式開幕，到依家都無咩聲氣，科技大學尋日就率先搞咗個「Ａ貨」火炬傳遞，由新任校長陳繁昌帶領廿幾個學生，喺校園接力運送火炬，除咗可以幫手宣傳吓東亞運之外，仲可以帶動學生做多啲運動，點知跑最後一棒嘅陳校長臨尾「甩轆」，跑得興奮得滯連個火炬熄咗佢都唔知道，真係大吉利是。
陳繁昌尋日一身運動裝打扮，Ｔ恤短褲鴨嘴帽上陣，咁啱呢幾日天氣轉涼，陳校長就喺Ｔ恤入面加件長袖衫打底，陳校長話，自己由細到大都好鍾意做運動，中學時係足球校隊，最拿手踢右翼位置，幫過學校攞過唔少次學界冠軍，依家得閒就會打網球，佢同前中大校長高錕都過過兩招，大家實力旗鼓相當。
雖然個火炬熄咗有啲唔好意頭，但陳校長就好識做咁話，佢都好想親身去睇吓東亞運動會嘅賽事，好似足球、排球、乒乓球、羽毛球咁，支持吓香港同中國隊，不過啲賽事咁受歡迎，唔知依家仲有咩飛賣，實行幫東亞運硬銷吓門票，呢個校長真係唔話得。