沈教授本身又得到中大師生嘅愛戴，校長個位都應該十拿九穩。不過兩年前城大選校長要推倒重來，早前浸大選校長又畀教職員公開批評係黑箱作業，證明凡事都唔可以講得太肯定。但Vincent尋日就話唔擔心呢啲事件會喺中大重演。

雖然Vincent公開明撐沈教授，但原來佢對沈教授認識唔深，而且Vincent仲同大部分香港人一樣，先知其名，後識其人。Vincent話係最近先同沈教授接觸多咗，不過就覺得佢係一個好隨和嘅人。而令Vincent最深刻嘅，就係沈教授嘅對抗沙士期間嗰種「搏晒命」精神，仲話有呢種拚搏精神嘅「亞洲英雄」，一定係「十分十分適合」嘅校長人選，可以領導中大再向前邁進。相信得到Vincent呢個「中大友」強力支持嘅沈教授，除咗開心之外，應該可以好放心嘞。