煲呔曾同金勞詹呢場飯局，事緣攞命陳上任金融管理局總裁一個月，所以想拜會本身係金融服務界嘅金勞詹兼請食飯，金勞詹覆佢，兩個人撐枱腳就無謂嘞，叫埋煲呔曾一齊就考慮吓啦，諗唔到攞命陳真係咁聽話。金勞詹見煲呔曾、攞命陳畀面，於是佢拍心口請客，地點係金勞詹嘅鐵竇潮州酒家佳寧娜，席間三人胃口唔錯，每人食咗兩隻大閘蟹，靚酒更加唔少得，觥籌交錯，杯盤狼藉之間，金勞詹即場加餸，送隻無情雞畀煲呔曾歎，為最近連串利益輸送風波，當面訓示煲呔曾。

煲呔曾民望肥佬，已經變成全城不受歡迎人物，但佢仲死雞撐飯蓋，日前大言不慚話自己「瞓得好」。不過，金勞詹就踢爆佢，話煲呔曾一坐低就訴苦：「我畀人蝦呀，詹叔。」煲呔曾嘅意思，即係想為自己嘅利益輸送醜聞卸膊，講到自己係被人屈，惡人先告狀，認真可怒也！

金勞詹即場訓示煲呔曾，叫佢做人要誠懇，做錯嘢咪認衰囉，傳媒同市民批評你，咪認咗佢囉，唔好再講乜嘢視民望如浮雲嘞，更加咪再咁自大，好似○五年一上任就話強政勵治呢類說話，千祈咪再講嘞！

叫攞命陳勿剛愎自用

跟住，金勞詹連剛由特首辦主任轉任金管局總裁嘅攞命陳都省埋，當面點醒攞命陳千祈唔好剛愎自用，以為自己天下無敵；要識得分權，啲嘢唔識就咪死充，交畀下屬做。金勞詹一向盯實任總嘅表現，佢前晚幽攞命陳一默，同攞命陳講：「你嘅人工得任總七成，我鬧你亦都鬧七成。」相信呢句話係攞命陳成晚聽得最開心㗎嘞。

金勞詹尋日同記者講番呢個飯局時，批評攞命陳根本唔適合做特首辦主任，搞到委任副局長一鑊泡，依家返咗金管局，做番自己熟悉嘅範疇，終於生猛番咁話。