根據香港大學民意研究計劃最新調查顯示，曾蔭權評分係四十八點四，較半個月前大跌五點八分。支持曾蔭權出任特首嘅比率係百分之三十五，跌咗十個百分點。反對佢做特首嘅比率係百分之四十九，升咗十二個百分點。至於特區政府嘅表現咯喎，滿意度係百分之二十七，跌咗四個百分點；不滿嘅比率係百分之三十九，升咗十個百分點。

簡單咁講，不滿情緒直線上升，反曾群眾愈來愈多。點解民調結果會係咁嘅呢？好明顯嘞，民眾眼睛是雪亮的，第一眼睇穿煲呔曾嘅施政報告冇料到，第二眼睇穿慳電膽政策搵老襯，第三眼更加睇穿含血噴人係非常之咁冇道理兼夾唔衞生，都唔知有冇豬流感病毒嘅。

港大民意研究計劃總監鍾庭耀老早已經講過，得分唔夠五十分嘅政治人物可以視作不受歡迎，如果得分低過四十五咯喎，就等於面對信任危機。換言之，曾蔭權已經淪為不受歡迎，十分瘀皮，你話係咪閉翳到極？雖然佢曾經好有阿Ｑ精神咁講過「民望於我如浮雲」啫，之不過再係咁落去，當奴鴨九成會變跛腳鴨。

唉，好多人都講過啦，詆毀傳媒一定唔會有好下場，枉煲呔曾打滾官場幾十年，又得意洋洋自稱政治家，居然連咁基本嘅政治學常識都唔明。更何況，傳媒質疑你利用慳電膽政策益親家，懷疑雷曼弟婦因為你而快人一步得到賠償，唔係生安白造喎，並非老屈硬砌喎。煲呔曾擺出一副爛仔格撩交打，左一句傳媒惡意中傷，右一句傳媒捕風捉影，喂，係人都唔妥你啦！

咦，咪住先咪住先，曾蔭權含喺口裏面嘅血噴晒未呢？如果未噴晒，仲有些少剩，港大呢份民意調查會唔會又成為含血噴人嘅瞄準目標o架？——哦，鍾總監你死嘞，你又「無中生有」陷害曾爵士！

有人計過數，家陣曾蔭權嘅評分，只係比董建華腳痛落台前僅僅多一分咁大把o架咋，一個唔覺意，隨時衰過老董舊時。計功夫茶話齋，唔使搵車公求籤，幾乎百分百肯定，煲呔一定衰過老董，點解？唔好唔記得，再過冇耐就要進行最敏感嘅政改方案諮詢，應承過玩鋪勁嘅曾蔭權到咗今時今日依然交白卷，你話佢嘅民望有乜可能唔再跌吖？到時咯喎，隔岸觀火嘅老董就可以鬆一口氣嘞，老懷安慰抹一額汗咁話：噓，我終於唔係回歸以來最不受歡迎嘅特首咯！

所以話啫，政治家最忌發爛渣，如果連臭脾氣都管理唔到，又點期望你管好香港！