長實集團執行董事趙國雄尋日傍晚幫「溥儀1881」尖沙咀嘅旗艦店做開幕嘉賓，向來識做嘅佢一剪完綵就拿拿臨入舖頭開張「好事成雙」嘅單，買咗兩副太陽眼鏡先出嚟，認真唔話得！「趙樓神」出名計仔多，每次有新樓推出，佢都會粉墨登場做宣傳，今次買定兩副眼鏡唔通要扮「黑超特警」？非也！是夜佢變身「中文老師」，教大家「明喻」同「暗喻」。
「趙老師」首先用買太陽眼鏡嘅價錢作明喻，講吓買樓心態，希望大家睇啱就買，唔使就住就住。「趙老師」今次買嘅分別係三千四百五十一蚊嘅Tag Heuer同一千八百二十八蚊嘅Ermenegildo Zegna，兩個都係名牌子，唔知佢下次會唔會做「數學老師」教呢兩個「冧巴」嘅含義呢？
買完眼鏡，「趙老師」又以香檳教暗喻，佢埋到張香檳枱拎起杯已經放咗一陣嘅香檳話︰「香檳要有泡先好飲！」醒目嘅侍應拿拿臨開過支新香檳畀佢，「趙老師」接過杯新酒，望住杯泡沫急升嘅香檳話，樓市要有泡沫大家先有錢賺，無泡沫嘅香檳無人會飲喎。唔知大家對「趙老師」呢番「樓市泡沫化論」又點睇呢？