潮流興講可持續發展，過去一年以擲蕉、爆粗出位嘅社民連，一樣要諗長遠發展大計，唔係靠一「蕉」走天涯，否則好快後勁不繼。據知社民連未來要三條腿走路，其中又以創立黨校諗得最具體，連名都諗好，叫「普羅政治學校」，「普羅」解無產，不過，社民連點計都唔係無產階級，日後黨校會分兩層次，一係專為黨內培訓有意從政之士，一係以收費方式公開收生，教授政治課程。咦，聽落呢條先至係社民連嘅真正出路喎，有「錢」途！

社民連喺大角咀物色咗一個單位，用作會址，位近旺角地鐵站，鍾意嘅話，可以攞嚟做埋民間電台大本營，不過業主開價三百二十八萬，加上裝修費要幾十萬蚊，社民連仲未籌足經費，要搵人揼心口。