關節痛無分貧富，富豪一樣中招。嘉華集團創辦人兼主席呂志和嘅太太呂趙錦屏亦深受膝關節痛之苦，屢醫無效，好彩遇上理大良醫至醫番好。不過更奇嘅事陸續有嚟，呂太自爆家族成員早前喺美國遇上嚴重車禍，最後卻奇迹地一條頭髮都無損傷。
向來係理大「大水喉」嘅呂志和，尋日聯同太太捐出四百萬元，支持理大成立「呂志和伉儷膝關節康復專科中心」。七十幾歲嘅呂志和健步如飛，但太太嘅膝頭近年出現退化，腳掌心不時隱隱作痛，試過針灸、推拿都唔掂，最後多得理大康復治療學系嘅教授打救，腳痛大有改善。
尋日呂太着住對三吋高跟鞋剪綵，配上一串如龍眼般大嘅珍珠頸鏈、耳環及戒指，手挽黑色Dior手袋，睇怕腳患已好得七七八八。呂太心情靚絕仲有另一原因，原來家人月前喺美國三藩市同朋友外出時遇上交通意外，幸好有驚無險。呂太唔肯透露家人遇險經過，話總之要多謝神喎。
講起樓市瘋狂飆升，身為地產發展商嘅呂志和繼續睇好樓市。佢話樓市仍未出現泡沫，樓價向上係因為通脹形成，預期樓價仍會向高位走。對於係咪支持政府恢復賣地，呂志和就話無所謂喎。