奏出梁山伯與祝英台淒美愛情故事嘅《梁祝》協奏曲，誕生至今剛好五十周年，原創者何占豪與演奏《梁祝》而聲名大噪嘅小提琴家西崎崇子，近期為慶祝《梁祝》金禧紀念馬不停蹄，除咗本月底喺香港大會堂舉行慈善音樂會，為四川地震災區籌建十所幼兒園外，尋日又專程到聖保羅男女中學附屬小學，與一眾學生分享音樂路，籲學生打好音樂基礎。
西崎崇子尋日一襲白色喱士配橙底長裙，再配Chanel米白色手袋、名錶及碎鑽戒指，外表雍容華貴，但內在更顯功架，她即席演奏一曲《梁祝》協奏曲，把呢首曲發揮至爐火純青地步，偶一不慎被她拉進梁祝愛情故事裏。西崎崇子仲同學生分享心得，話學音樂就好似起高樓咁，根基要打得好，拉小提琴嘅姿勢不但重要，集中精神演奏同拉得流暢亦都相當重要。
何占豪就透露自己出身農村，沒想到有今天嘅成就，最重要係奮鬥同有理想，不怕辛苦，佢期望學生們打好音樂基礎，將音色和音準練好，奏出生動音樂，發揚中國音樂。