本文重點
名模琦琦每次出席公開場合定必打扮到明艷照人，由頭到腳都一絲不苟。前日見到戴住黑超嘅琦琦喺銅鑼灣出現，佢急急腳入咗去Hair Salon，原來Book咗髮型師，趕住去扮靚靚。佢同卓妮講，夜晚要參加時裝品牌Louis Vuitton嘅圓方店開幕活動，所以專登嚟Salon整頭。
幫襯咗十幾年
提起頭髮，琦琦話呢間係佢嘅指定髮型屋，御用髮型師就係Kelvin Koo，佢話：「佢幫我剪咗頭髮十幾年，唔單止我，我全家人，包括老公、囡囡同媽咪都係搵佢，大家已經昇華到好朋友關係！」琦琦又話同Kelvin合作咗咁多年，已經去到心有靈犀嘅階段，Kelvin好清楚琦琦嘅需要，亦知道邊類髮型適合琦琦，所以琦琦都好放心將個頭交畀Kelvin。
千四蚊剪個頭
不過，工作以外，琦琦唔會花太多時間喺髮型方面，佢好爽快話﹕「我唔可以喺Salon坐五、六個鐘，每次都係一個鐘之內完成，平均兩、三個月就要剪一次頭髮，因為我嘅頭髮長得好快。」御用髮型師Kelvin，係Salon嘅Director級髮型師，幫襯一次盛惠$1400，琦琦當然係收友情價啦！不過，前日Kelvin去咗北京做嘢，琦琦惟有搵髮型屋另一位髮型師Jerry Liu幫手。
去完髮型屋扮完靚靚，琦琦同老公任達華（華仔）換上一身最新秋季LV服裝，手拖手出席圓方嘅LV概念店開幕酒會。琦琦以今年流行嘅闊身牛仔褲，再襯件紫色紅間恤衫，外面加件寶藍色針織外套，相當中性嘅打扮；華仔就繼續做型男，黑色恤衫加件灰色西裝配西褲，每人嘅打扮都要成三萬元。
華仔話最近忙住拍西片，仲要喺深山取景，造型好粗獷，琦琦笑佢連Facial都唔使做。華仔之前有鬍鬚，不過拍戲返嚟為咗個女就剃咗，因為有鬍鬚，囡囡唔畀佢攬同錫。琦琦尋日就起程去北京做騷，當地天氣凍，佢話要帶定多啲厚衫去。
卓妮