早喺自由黨出遊西藏前，該黨內部已經傳出消息，指田二少已經做足工夫，磨拳擦掌出戰新西，常委方國珊則由前主席田北俊排第二力挺重奪新界東議席。時間唔遲唔早，喺隨後嘅青藏鐵路廿個鐘頭車程，有親中陣營統籌人主動交心，叫田二少棄守九西，分析指田二少同梁美芬票源重疊，田二少再戰結果一樣，不如去新西承接「莎姐」周梁淑怡嘅兩萬張票，開拓中產票，同走基層路線嘅民建聯、工聯會完美分工，承諾會將民記去年所得九萬二千張票嘅剩餘票，撥歸自由黨。若田二少一如所料下屆轉去新西選，都可以話順水推舟，否則分薄票源大家都冇好處。

話暫時全神貫注區選

消息話，距離二○一二年立法會選舉仲有三年，親中陣營已經開始部署排陣，為免重蹈去年自由黨喺新界東和新界西意外出局、畀民主派漁人得利嘅局面，今次提早向自由黨交心，互相摸底，費事臨時倒瀉籮蟹。民記去年喺新西攞九萬二千張票，其實攞八萬三千票，已經足以將張學明帶入局，即係話白白嘥咗近一萬張票，如果過戶晒畀自由黨，親中陣營要喺該區攞四席，唔係無可能。

田二少去年喺九西雖表現勇猛，不過，孤掌始終難鳴，失去親中陣營協調，要跑出難度太大，所以，田二少轉戰新西、開拓新地盤，聽落順理成章，而消息亦喺黨內愈傳愈盛。

田二少接受我哋查詢時，無承認亦無否認被力勸轉戰新西嘅消息，只係一再強調，至今未諗立法會選舉，依家全神貫注二○一一年區議會選舉，要視乎選戰後嘅政黨勢力分布，先至決定立法會落戶邊區。田二少話，經歷去年立法會一役，明白樁腳嘅重要性；如果區選之中，自由黨發現自己喺新西站唔住腳，邊個撐自己都無用咁話。咁即係，若親中陣營統籌人要成功勸喻田二少去新西選，二○一一區選可能就要率先支持自由黨喺新西搵定樁腳。