新鮮委任嘅兩位副局長尋日履新，其中保安局副局長黎棟國表現得好客氣，佢伸出友誼之手同記者握手，又向記者噓寒問暖。政制及內地事務局副局長黃靜文就比較離奇，佢竟然假扮落車畀記者影相，既虛假又唔環保。
一年幾前委任搞出風波嘅副局長成日畀人鬧話潛水，尋日兩位履新嘅副局長就大大方方企出嚟，實際做法就各師各法。黎棟國首先露面，見到喺政府總部「恭候」嘅記者，佢一開口嘅話題係天氣，佢話天氣轉涼，叮囑大家咁早起身要着多件衫。
話晒佢都係見慣世面嘅退休高官，答問時氣定神閒，佢話全民抗毒將會係佢嘅首要工作，至於接連發生懷疑掟鏹水，黎棟國話希望警方盡快將兇徒繩之於法，仲呼籲市民有料要舉報。最後臨走前仲同記者逐一握手，再三叮囑要着多件衫。
轉個頭，黃靜文又坐車抵達。咪住！頭先明明見佢已經上咗樓，因乜嘢又坐車返嚟？原來佢特登畀大家影相，佢都認話先前已經上咗樓，唔明啲記者點解咁好眼見到佢。其實佢行番落嚟講嘢都無問題，坐車重新「出台」，就未免太騎呢嘞。