台上顯唱功

呢個名為「潮飲潮玩好鬼盞」嘅活動，喺較早之前已經舉行過幾場，由於反應熱烈，於是酒商聯同尖沙咀M-Zone Bar，再加推一個萬聖節特別版，更邀請咗Renee及Miyoko做嘉賓同大家玩遊戲，前者被譽為可愛甜心藝人，後者則係集青春與性感於一身嘅索女，難怪當晚酒吧人山人海喇！

喺活動中，Renee及Miyoko首先同觀眾玩「歡樂卡」遊戲，老實講，啤牌估大細真係靠彩數，之不過兩位靚女非常幸運，協助所有參加者都能獲獎，認真Lucky！之後再玩「最佳拍檔」遊戲，佢哋就分別邀請咗一位觀眾上台合唱，Renee係歌手出身，當然冇難度啦！雖然Miyoko係模特兒出身，但於台上獻唱時絕不遜色，博得觀眾唔少掌聲！

美少女受驚

直到壓軸大抽獎時，主辦單位特別安排咗現金作獎品，並由Renee及Miyoko擔任抽獎嘉賓，台下觀眾反應熱烈，再度掀起高潮。期間發生咗一段小插曲，有位露臍裝嘅男觀眾上台領取千元現金獎時，唔知係咪興奮得滯，竟突然起舞，仲搶咪話：「影相事小，攞獎事大，哈哈哈！」睇見呢位觀眾情緒極度高漲，Renee當堂有啲嚇親，竄到Miyoko同司儀Ying Ying身後，Miyoko見狀即勇救師姐，以身軀頂住對方，幸好男觀眾好快就冷靜落嚟，虛驚一場啫！

撰文、攝影：娟娟