相差廿載話無代溝喎

劉校長同Ayesha外表看來年齡至少相差三十歲，加上二人背景又風馬牛不相及，政商界對呢宗婚訊都大感意外，有傳劉、麥二人係因上年底一齊出任經濟機遇委員會而結緣，如果傳言屬實，曾蔭權搞吹水會無心插柳撮合一對新人，可能係經機會成立以嚟最大兼唯一嘅成就。

Ayesha話聽到外界對佢年齡有美麗嘅誤會都好開心，不過佢強調自己年紀都唔細，因為佢喺畢馬威會計師事務所已經工作二十一年，到九八年一月先做合夥人，佢笑言：「我幾多歲大家都估到啦！」數數手指，就算Ayesha大概四十歲，同劉校長都相差廿幾年，唔知二人相處時會唔會有代溝呢？Ayesha直言：「從來冇諗過呢個問題，因為同佢一齊好舒服。」至於二人係咪喺經機會擦出愛火，Ayesha就話太私人嘅問題不便回應，但其實兩人早喺社交場合已經結識。

經機會成婚姻介紹所

劉校長尋日出席香江論壇大談港台合作機遇，卓妮都有去捧場，會後仲不忘恭賀佢。當被問到訂婚傳聞時，劉校長隨即報以微笑並輕聲說：「係。」但被問到二人是否喺經機會結緣，佢即簡潔應咗句：「唔係。」至於婚事詳情，劉校長乜都唔答，只係不斷向記者說：「多謝！多謝！」

劉校長（左四）尋日出席香江論壇，對台港合作好多意見，但問到婚事就乜都唔答。 （陳雪玲攝）

麥嘉軒係「哥哥」疼愛嘅外甥女，○三年逝世後留畀麥一大筆遺產。 （資料圖片）

失婚男女　名成利就

劉遵義同麥嘉軒（Ayesha）呢對準新人，原來都經歷過情場失意，本身為美國史丹福大學講座教授嘅劉遵義，○三年獲中大聘任校長至今，當年有報道指，劉上任前一年，婚姻亮起紅燈，隨後決定與第二任太太離婚，並選擇回港工作。

至於Ayesha，母親係消委會首任總幹事、已故歌壇巨星張國榮嘅家姐張綠萍。張國榮○三年去世，留畀Ayesha同孖生妹妹每人四千萬元遺產。本身係畢馬威會計師事務所合夥人嘅Ayesha，近年活躍於政界，○七年以技術顧問身份隨時任財爺唐英年四出講解銷售稅。聽會計界人士講，原來Ayesha嘅前夫係建築界人士，二人早年仲不時一齊出席公開活動，行內到依家都冇乜人知道佢哋原來已經離咗婚，所以大家對於佢再婚嘅消息感到好震驚。

卓妮