原來喺新學制下，當局將智障學生嘅離校年齡上限由二十歲降到十八歲。因乜事幹智障學生一到十八歲就要被迫踢出校？點解唔畀佢哋讀書？仲使講，擺明係玩針對兼製造歧視啦。

唉！咁嘅新學制，唔畀人插到七彩至奇啦。有一位家長仲代表佢嘅智障仔仔入稟高等法院，指當局涉嫌違反《殘疾歧視條例》、《殘疾人權利國際公約》。雖然上次敗訴，但學者認為佢哋嚟緊嘅上訴，由於有更強嘅論證，勝算大增，當局至不得不急急腳掟兩個改善措施補鑊。

嗱，補鑊第一招就係放棄智障學生要喺十八歲離校嘅決定，等有真正需要或有合理原因嘅學生，可以完成課程之後至畢業離校。另一招係當局準備額外增加經常性開支，增加特殊學校智障學生嘅額外學額。

唔係啩，原來咁就叫補鑊？可惜事與願違，呢啲新措施，擺到明就係為咗塞住學生家長把口啦，頂晒籠都係延長留校一至兩年，又冇改善教育質素，根本就係治標不治本，叫人點收貨呀！

關注特殊教育權益家長大聯盟主席趙張麗文斷言對新方案感到遺憾，表明唔會接受呢個方案。此外，其中一間特殊學校佛教普光學校校長何巧嬋亦慨嘆，新措施反映當局終於承認之前係做錯。

講到底，今次搞出咁嘅大頭佛，完全因為當局不嬲唔重視特殊教育，再加上喺制訂政策同設計課程時，完全冇通盤計劃，根本冇考慮過智障學生實際情況同困難！

話時話，唔好以為當局今次讓步係良心發現呀，其實不過為咗多一事不如少一事。有學者表示，近年政府每逢撞到有司法覆核，逐漸變成「輸多贏少」嘅局面，今次極有可能因為怕輸所以至讓步咋。

冇辦法啦，弱勢政府吖嘛，係人都知呢個政府唔鬧唔郁，施政甩皮甩骨。由舊年嘅生果金資產審查風波，到今年嘅慳電膽現金券可見一斑，有邊次唔係眾怒難犯嘅情況下修補褪軚？不過教育係一項神聖而莊嚴嘅工作，搞到家長好似去街市買菜咁，乜都要同政府講數至得，點可以咁兒戲！

政府官員無心無肺成咁，計功夫茶話齋，應該要快啲搞番個「新官學制」，將佢哋掟入管治ＢＢ班再教育至得！